Nittartakkakkut pikkorissarneq modul 4-5
Pikkorissarneq una imatut ingerlanneqassaaq: pikkorissarneq najuunnani ingerlanneqassaaq sapaatit akunneri sisamat sivisussuseqassalluni, ZOOM atorlugu sapaatip akunneranut marloriarluni pisassalluni. Pikkorissarneq ataaseq minutsinik 60-65 missaani sivisussuseqartassaaq. Pikkorissarnerit saniisigut immikkut nammineq suliassanik tunniussisoqartassaaq kiisalu suliassanik sungiusaatissanik. Pikkorissartut suliaat pikkorissaasumit kukkunersiorneqartassapput. Saniatigut pikkorissartut pikkorissaasumik ataasiakkaarlutik oqaloqatigineqartassapput pisariaqartitsineq najoqqutaralugu.
Siunertaq:
Ulluinnarni kalaallisut oqaatsit atorlugit pikkorissartup piginnaasaqarnerulernissaa kiisalu kalaallit oqaasiisa sananeqaataasa tunngaviusumik paasilluarnissai.
Imarisaa:
Pikkorissarneq kalaallisut oqaasilerinermik aallaaveqassaaq, atuagassat assigiinngitsut kiisalu oqaluttariarsorluni saqqummiineq.
Pingaarnertut imarisaa:
- Oqaasilerineq
- Allattariarsorneq
- Oqaloqatigiinnerit
- Piorsarsimassutsimik paasinninneq
- Nammineq oqaaseqatigiiliornerit