Saffiooq immikkut VVS-Energitekniker-mik sammisalik

Saffiuut sanaassat assigiinngitsorpassuarnik ilusillit angissusillillu saalimasut siaangasullu, ruujorit assigiinngitsunik issussuseqarlutillu ilusillit, titartakkat najoqqutassiallu assigiinngitsut kiisalu ilitsersuutit assigiinngitsut oqaatsinik assigiinngitsunik allassimasut najoqqutaralugit suliaqartarput. Saffiooq immikkut VVS-Energitekniker-mik sammisalik kissarssuutit assigiinngitsut, silaannarissarfiit, soorlu illuni anginerusuni, illorsuarni fabrikkinilu iluarsaallutillu ikkussortarpaat. Energiteknikerituttaaq najugaqarfinni uffarfinni/perusuersartarfinni atortunik suliaqarsinnaasarpoq.  Kuuffiit, errortortarfiit, wc-it seqqittaatit allarpassuillu iluarsaattarpaat. Imermut atuinissamut sipaarutaasinnaasunik atortunik soorlu seqernup nukinganik atortutallit ikkussortarpaat. Vvs-energiteknikerit illoqarfimmi ruujorit gasimut,  imermut  kiassaatitullu atortut aqquserngit ataatigoortut ikkussorlugillu iluarsaattarpaat. Energiteknikerit ruujorilerisuni, imeqarfinni elværkini, suliffeqarfinni pinngortitamiit nukissaliorfiusuni suliffissuarnilu sulisarput. Sulinerit værkstedini, sanaartorfiusuni najugaqarfiusuniluunniit ingerlanneqartarput.

Piumasaqaatit

1. Ilinniartuuneq suliffimmi sungiusarluni imalt. Piareersarfimmi aallarnisarluni aallartittarpoq.
2. Tamanna pereerpat ilinniartut Saviminilerinermik Ilinniarfimmi sap.ak. 8-ni siullermeertumik ilinniariartortoqassaaq.

Tiguneqarnissamut piumasaqaatit

Ilinniartunngorniaraanni Najukami ilinniarfimmiit imalt. kommunep kulturikkut ilinniartitaanermullu allaffeqarfikkut (KUF) imalt. suliffissarsiuussisarfimmiit qinnuteqartoqassaaq.

Karakteerinik 13 skala atorlugu misilitsinnikunut piumasaqaatit
Meeqqat atuarfianni 11. klassemi soraarummersimanissaq piumasaqaataavoq minnerpaamik karakterigalugit qallunaatut 6, kisitsinermi 7, fysik 6 aamma tuluttut 6 assigisaanilluunniit piginnaasaqarneq.

Karakteerinik ECTS-skala atorlugu misilitsinnikunut piumasaqaatit
Meeqqat atuarfianni 10. klassimi soraarummeernissaq piumasaqaataavoq minnerpaamik karaktereralugit qallunaatut E, kisitsinermi D, fysik E aamma tuluttut E assigisaannilluunniit piginnaasaqarneq.

Ilinniartutut tigusaanissamut piumasaqaataavoq suliffimmik sungiusarfeqarneq. Suliffimmik sungiusarfissaqarnissaq ilinniartup namminneq akisussaaffigaa, ilinniarfiup Najukkamilu ilinniarfiup ilinniartup sungiusarfissamik nassaarniarnerani ikiorsinnaavaa. Ilinniartoq sungiusarfissaqanngikkuni, atuarfimmi sungiusarnissaminut qinnuteqarsinnaavoq.

Ilinniarnerup ingerlarnga

Saffiooq immikkut VVS-Energitekniker-mik sammisalik ilinniarneq ukiunik 4-nik sivisussuseqarpoq, taakkunannga sap.ak. 55-it ilinniarfimmi ingerlanneqartarput.

Ukioq 1.				Ukioq 2.			Ukioq 3.			Ukioq 4.
	8		12		10			10		10		5

Ima ingerlasarpoq

Saffiuutut ilinniarneq atuarfimmiittarnermik sungiusarnermillu paarlakaasuuvoq. Tunngaviusumi ingerlanermi ilinniarfimmiittarneq sap.ak. 8+12-nik sivisussuseqarpoq, taaguuteqarlutillu GF1 aamma GF2.

Ilinniarnerup ingerlaqqinnerani sisamariarluni ilinniarfimmiittarneq sap.ak. katillugit 35-nik sivisussuseqarpoq. Taaguuteqarlutillu H1, H2, H3 aamma H4.

Ilinniarfimmiittarneq

Saffiooq immikkut VVS-Energitekniker-mik sammisaliup ingerlarnga  GF1 aamma GF2 Saviminilerinermik Ilinniarfiup  isumagisarpaa, ilinniarnerullu sinnera suleqatitsinni Ålborg Tekniske skole-mi  ingerlanneqartarpoq.

Atuarnermi ilinniagassat

Tunngaviusumi ilinniarnermi ilaatigut sisamanik siunertalinnik ilinniagassaqarputit: maskiinanik sakkunillu ilisimasaqarneq, sullivinni avatangiisit saviminernillu manngertornineq ajortunik nipititerinerni sillimaniarneq (nikkelkursus), kissassuseq atorlugu katiterineq aamma sanarfiineq.

Ilinniarnerup ingerlaqqinnerani toqqammavissatut makku sammineqassapput: qallunaatoorneq, uummaatsulerineq, inuiaqatigiilerineq, sanaartukkanik pitsanngorsaaneq, sanaartorneq sullissinerlu, atortussianik paasisimasaqarneq kiisalu tuluttoorneq.

Nalinginnaasumik ilinniagassat: killuineq sanarfiinerlu, kissassuseq atorlugu katiterineq, maskiinat assaallu atorlugit sanarfiineq, uuttueriaatsit, titartakkanik paasinnissinnaaneq nalunaarsuinerlu, inissititeriaatsit ikkussueriaatsillu kiisalu katitereriaatsit.

Immikkut itisilerlugit ilinniagassat

Svejserinermik allagartartaarneq. Atortunik kiassaanermut tunngasunik ikkussuineq, kiassaateqarfiliornissamik pilersaarutiliorneq, aqutsineq aaqqissuinerlu, ungataaniit kiassarneqarneq, , imermik suliaqarneq, imermut atortunik pilersaarutiliorneq, ruujorilerineq, silaannarissarfilerineq, suliffissuarni silaannarissarfilerineq, silaannarissarfinnik aserfallatsaaliuineq, kuuffiit.

Ilinniaqqinneq

Immikkut qinersimasatit malillugit installatørimut maskinmesterimulluunniit iliniaqqissinnaavutit.